NOVAS MARRUBIESAS

Novas marrubiesas, est sa newsletter periòdica de informatzioni istitutzionali contivigiada de su Servìtziu linguìsticu sardu comunali.

Is punnas de su follieddu informativu funt a su mancu tres: 1) afortiai sa comunicatzioni de su Comunu, po chi is citadinus siant sèmpiri informaus de is fainas de s’Amministratzioni comunali e de is iscadèntzias prus de importu; 2) giai boxi fintzas a is citadinus arriunius in forma assotziada po informai de is fainas de is assòtzius presentis in Marrùbiu, Centru Tres, Is Bàngius, Masòngiu e Sant’Anna; 3) giai visibilidadi pùblica e ufitziali a su sardu, lìngua ancora bia e biatza in sa comunidadi nosta, ma fueddada su prus me in situatzionis de comunicatzioni informalis (cun is amigus, in famìllia e sighendi a nai) e pagu me in is cuntestus ufitzialis.

Creeus, aici, de ammelliorai sa trasparèntzia de su fai de ònnia dì de s’Amministratzioni e de dd’acostiri de prus a is marrubiesus, intrendi - chi ddu bollint - inderetura in domu insoru. Difatis, Novas marrubiesas podit essi arriciu po mesu de sa e-mail: bastat a ddu pediri mandendi una punta de billetu eletrònicu a s’indiritzu servitziu.linguisticu@comunemarrubiu.it, iscriendi su nòmini e su sangunau e “bollu arriciri Novas marrubiesas”.

In prus, pentzaus de fai cosa agradèssia e pretzisa lassendi logu a informatzionis chi arriguardant fainas e initziativas de is assòtzius marrubiesus.

Infinis, sa chistioni de sa lìngua sarda: ndi depeus torrai a essi meris in ònnia logu e in cali si siat situatzioni, non candu chistionaus cun is amigus, cun sa genti chi connosceus o in famìllia nosta isceti, ma fintzas me in is localis e ufìtzius pùblicus, incummentzendi de su Comunu. Teneus sa cuscièntzia ca, chi est berus ca seus abituaus a chistionai in sardu, arresceus unu pagheddu candu ddu ligeus e dificultadis mannas nascint po dd’iscriri. Est po cussu chi custu follieddu at a bessiri iscritu in sardu: est una manera po torrai a pigai cunfidèntzia, a pagu a pagu, cun sa lìngua nosta, ligendidda puru e non chistionendidda o ascurtendidda isceti.